విషపు నవ్వు

నవ్వడం అంటే
పెదవుల్ని విదిలించడం కాదు
నవ్వడం అంటే
కళ్లని చికిలించడం కాదు
నవ్వడం అంటే
గొంతుని సకిలించడం కాదు
నవ్వడం అంటే
మనసుని పలికించడం
నవ్వడం అంటే
బంధాన్ని పెనవేయడం
నవ్వడం అంటే
మనుషుల్ని అల్లేయడం

పెదవుల్లో విషాన్ని దాచుకుంటే
ప్రేమ పుడుతుందా...
అనుబంధాల వాన కురిస్తే
పాషాణం కరిగిపోతుందా... 

గుండెల్లో దోషాన్ని దాచుకొని
కళ్లల్లో వక్రభాష్యాన్ని నింపుకొని
మాటలకు పంచదార అద్దుకొని
పెదవులపై మల్లెల జల్లు కురిపిస్తే
విరిసేది నవ్వుకాదు, విషపు పువ్వు

                         -కేశవ్