Friday, February 9, 2018

బర్నింగ్ కామెంట్రీ 2

ఆంధ్రుడన్న మాట వింటే
ఎందుకంత ఉలికిపాటు
ఆంధ్ర రాష్ట్రమెందుకన్న
పటేల్ కంటే పహిల్వాన్లా

తలుపు మూస్తే గాయం
తలని కోస్తే న్యాయమా?
ఇదెక్కడి అరాచకం 
ఇది కాదా ఆటవికం

మాటిస్తే నమ్మడం
ముంచేస్తే తుంచడం
అదీ, ఇదీ ఒక్కటే
లెక్క చూసి బాదుడే

ప్రత్యేక హోదానే వద్దంటే
అసలు మీకిక్కడ చోటేది
ఇంకు చుక్క తుఫానులో
దమ్ము చూపే దారేది?

ఇచ్చిన మాటని చెల్లిస్తే 
పూల విరుల స్వాగతం
ఇది కాదని మీరితే
సమాధులకే తోరణం
                  -కేశవ్

Wednesday, February 7, 2018

బర్నింగ్ కామెంట్రీ!

చెప్పిన మాటలు చెల్లనిచోట
చిల్లర పాటలు పాడిన నోట
రాజకీయం రుచిలేని భోజ్యం
రాజీనామా నిషాలేని మద్యం

ఇంతవరకు చేసినవన్నీ గారడీలే
ఇందాకా కొట్టించినవన్నీ బురిడీలే
కుయుక్తి కుర్చీలెక్కిన కేడీలకు
జనం తల్చుకుంటే పడేది బేడీలే

పకోడీల పాలనలో 
హోదా ఒక చోద్యం
పల్లేరుల పానుపేసి
చెకోడీలతో ఉరితీద్దాం

ఎంకన్నకు పవరుంటే 
ఇంకెందుకు ఆలస్యం
మాటిచ్చిన నాలుకలే
చీలిపేలికవుట తథ్యం
                       -కేశవ్
(దేవిప్రియ స్ఫూర్తితో)



Thursday, January 11, 2018

చేస్ట్రో!

అగ్గిపూలను పుక్కిలించి
ఉగ్గుపాల రుణం తీర్చిన వాడు
మూసి ఉన్న పిడికిలిలో
ఎగిసిపడే సముద్రం వాడు

రెక్కలు తీసేసినా ఎగిరే
ఎడతెగని సంకల్పం వాడు
మృత్యువుకి ఎదురెళ్లే
మరణ మృదంగం వాడు

తరాలు మార్చిన సందేశం ఒకడు
తలరాతలు రాసే సాహసం మరొకడు
ఇప్పటికీ వదలని జ్ఞాపకం ఒకడు
ఎప్పటికీ చెరగని సంతకం మరొకడు

                            -కేశవ్
(క్యాస్ట్రో నిష్క్రమణకు నివాళిగా...)

Sunday, September 24, 2017

నీ... కు!

పొగ తాగేస్తే ప్రేమ పొదుగు
చిక్కినట్టేనా...
చావేజేమైనా చే గెవారాని
మించినోడా...
చుస్తే చూస్తం.. లేకపోతే లె...
ఆర్ట్స్ కాలేజీ గేటు ముందు
ఉచ్చ పోస్తే నీకేంది
ఉరేసుకుంటే నీకేంది

కళ్ళకి నెత్తుటి చారిక
వేళ్ళకి పరీక్ష నాళిక
కాళ్ళకి గుర్రపు నాడా
గుండెకి పాబ్లో నెరూడాని
తగిలించాలని చూస్తే, ఊరుకోం
***        ***      ***

బే... అంటావు
బేవకుఫ్ అంటావు
బేషరం, తిడతావెందుకు
తీట తీరేవరకు పడుకోనివ్వక

మాకళ్ళకి ఐటెక్స్ కాటుక
మావేళ్ళకి రెవ్లాన్ నాళిక
మాకాళ్ళకి బాటా బిరడా
మాగుండెకి నీరో గురుడూ
వేళ్ళాడితే నీకు ప్రాబ్లమేంటి?

రిప్ వాన్ వింకిల్ లేచినప్పుడు
రింకిల్స్ లేని ప్యాంటు ఉందా
జిమ్మీ జెట్ టీవీ సెట్ గా మారిపోతే
జిమ్మీ మమ్మీ ఏంచేసిందో రాయి...

ముల్లుకర్ర పట్టుకొని
ములుకు కొడవళ్ళు పెట్టుకొని
మా వెంట పడతావెందుకు
జాగ్ నే కీ రాత్ ఖతం హోగయీ
సోనే దో భాయ్... సోనే దో

                          నీ... కవిత్వాన్ని నిరసిస్తూ...
                                     -కేశవ్

Friday, September 1, 2017

పరతంత్రం


యుద్ధం నాది
గాయం నాది
గెలుపు వేరొకరిది

పేర్చిన బతుకు నాది
రాల్చిన చెమట నాది
ఫలితం వేరొకరిది

మోసే భుజం నాది
చేసే కవాతు నాది
విజయపతాక వేరొకరిది

                       -కేశవ్



Saturday, August 19, 2017

చినుకు మొక్క!

వాన మంచిదే కానీ 
వద్దన్న చోటే పడుతుంది ఎందుకు?
పుట్టడమే గొప్ప అనుకున్న చోట
పుట్టుకతో చావు జతకట్టిన చోట
బతికినా చచ్చినట్టే కనిపిస్తోంది ఎందుకు?

చావుకి కొలమానం రాలిపోవడం
రోజూ రాలే ఆకుల లెక్క
ఆయువు కొలిచే కాలమితి
చెట్టుకి చచ్చిపోవడం తెలుసు
బతికి బట్టకడ్డడం తెలుసు
ఒక్క చుక్క నీటితో జీవం పోసుకొని
పచ్చని పరికిణీలు అల్లుకోవడం తెలుసు
నీటి చుక్కల నేతిమూటల్లో
జీవపు పరిమళాల్ని అద్దుకోవడం తెలుసు
మహోజ్వల జీవి మనిషి మాత్రం ముగింపులో
ఉషోదయాన్ని చూడలేకపోతున్నాడు ఎందుకు?
మరణాన్ని అమృతం చేయాలంటే
మట్టి పొత్తిళ్లలో చినుకు మొక్కలు నాటాల్సిందే
                           -కేశవ్