ద్వేషం

నన్ను
ఎక్కువగా ద్వేషించొద్దు
మళ్లీ ప్రేమించాల్సి వస్తుంది

నన్ను 
ఎక్కువగా ధూషించొద్దు
మళ్లీ కీర్తించాల్సి వస్తుంది

నన్ను 
ఎక్కువగా నిందించొద్దు
మళ్లీ ఓర్చుకోవాల్సి వస్తుంది

మాటలు చెప్పడం కాదు
మనసుని విప్పడం అంటే
కోటలు కట్టడం కాదు
నీతికి నిలవడం అంటే

ఎగిరే గాలిపటాన్ని కాదు
దారం తెగి నేలరాలటానికి
ఎగిసే పిల్లతెమ్మరను కాదు
దూరం చూసి ఆగిపోడానికి

అలసట ఎరుగని 
సముద్రం నా ఆదర్శం
బతుకు బాసట చెప్పే
శిఖరతత్వం నా స్ఫూర్తి

అనంత విశాలత్వంలో 
అల్పత్వానికి చోటుండదు
అద్దాల మందిరంలో
అన్నీ అసలు బింబాలేనా
నకిలీ బొమ్మల మధ్య
నిజాన్ని చూడటమే కష్టం

ఎగిరినపుడు పక్షిలాగ
నడిచినపుడు నింగిలాగ
దూకినపుడు సముద్రంలాగ
మారిపోవడం నాకు సహజం
అందుకే
ఎక్కువగా ద్వేషించొద్దు
మళ్లీ ప్రేమించాల్సి వస్తుంది

                      -కేశవ్