నాలోనే ఉంటూ
నాకు తెలియని
నువ్వు ఎవరు
నిన్ను ప్రశ్నిస్తే
నా ఉనికి ఎందుకు
ప్రశ్నార్థకం
నిన్ను నిందిస్తే
నా మనసుకి
ఎందుకు గాయం
*** *** ***
నిప్పుని కప్పేస్తే
నిజాలకు ముసుగులేస్తే
అబద్ధాలైపోతాయా
నిజయితీని కొనలేరు
నిజ నిరూపణలో
నియమాల్ని మార్చలేరు
ఆత్మలకు అసలు
ప్రశ్నించే హక్కే లేదు
ధిక్కరించే మార్గం అంతకన్నా లేదు
*** *** ***
ఎవర్నీ వినకు
విన్నా నమ్మకు
నమ్మినా పాటించకు
నమ్మకానికి హామీపత్రాలు
బజార్లో దొరకవు
బజారు మనుషుల దగ్గర ఉండవు
నిలువుటద్దాల దారుల్లో
నిజాల్ని వెతుక్కోమంటే
భుజాలు తడుముకోవడం ఎందుకు
*** *** ***
నాలాగ ఉండగలిగితే ఉండు
లేదంటే నీదారి నువ్వు చూస్కో
నా ప్రయాణం నాకు నచ్చినట్టే
అంతరంగమే ఎదురు తిరిగినప్పుడు
అంతర్యుద్ధమే తప్పనప్పుడు
అర్థంతరంగానైనా ఆపేస్తా
నాకు నేను నియంతను
నా తలరాతకు విధాతను
నా నిర్ణయానికి ఓడినా, విజేతనే
-కేశవ్
0 comments:
Post a Comment