సీమంతం

సిగ్గులేని జాతి ఇది

ప్రశ్నించే హక్కుందా

దిక్కుమాలిన జనానికి

దిశ మార్చే శక్తుందా

సీమ శోకం చూస్తె

చీమైనా కుట్టదు

కుమ్ములాట కుళ్లులో

ఇసుమైనా మారదు

కన్నీళ్లతో బతుకుల్ని

కలకాలం గడిపేద్దాం

కలిసి రాని నేతలతో

జీవితాల్ని కాలరాద్దాం

ముదనష్టపు మూర్ఖులే

మనగద్దెక్కిన పెద్దలా

మారని తలరాతలకు

మంచిగంధం చితులా

తెలుగు తెలుగు తెలుగంటే

తీరని దిగులేనా

భాష మీద మోజుంటే

భావమంత దాస్యమేనా

మాట ఒకటి మనదైనా

మనసంతా మసకేనా

జాతి ఒకటి అనుకుంటే

జగమంతా వేరేనా

తెలంగాణ, సీమగానం

కళింగాంధ్ర శషబిషలు

కలహాలతో కలకాలం

కలసుంటే మిగులు దు:ఖం

వీడు పోతే వాడు

వాడు పోతే వీడు

ఎవడో ఒకడి మీద

ఏడుపే ఎదగడమా

పాలకులు మీరే

బాధితులు మీరే

ఎన్నాళ్లీ బరువు మాట

ఎన్నేళ్లీ పొరుగు పాట

బళ్లారిని వదులేస్తే

బతుకు తెల్లారలేదా

తెలంగాణ తప్పుకుంటే

 వేరు పోరు చల్లారలేదా 

తల్లైతే ఒకతె గానీ

ఎన్నిసార్లు ఈ సీమంతం

తెలుగు నేల తోలు

బొమ్మాలాటకు లేదా అంతం

-కేశవ్